«ҚазМедТех» АҚ халықаралық ынтымақтастықты кеңейтуде: Siemens Healthineers басшылығымен жұмыс кездесуі өтті.

2025 жылғы 02 желтоқсанда «ҚазМедТех» АҚ басшылығы медициналық технологиялар саласындағы әлемдік көшбасшылардың бірі — Siemens Healthineers компаниясының топ-менеджментімен жұмыс кездесуін өткізді. Кездесу Қоғамның медициналық жабдықтарды лизинг арқылы қаржыландыру тетіктерін дамыту және халықаралық экспорттық-кредиттік ұйымдармен өзара іс-қимылды тереңдету бағытындағы жүйелі жұмысы аясында ұйымдастырылды.
Келіссөздер барысында тараптар Қазақстанның медициналық ұйымдарына заманауи қаржы құралдары арқылы жеткізілетін жоғары технологиялық жабдықтар тізбесін кеңейту мүмкіндіктерін талқылады. Лизингтің орнықты үлгілерін енгізу мәселелеріне ерекше назар аударылды.
Siemens Healthineers қазақстандық нарықтың маңыздылығын және денсаулық сақтау инфрақұрылымын жаңғыртудағы «ҚазМедТех» АҚ-ның рөлін атап өтіп, ұзақ мерзімді ынтымақтастыққа мүдделілік білдірді.
Аталған кездесу Қоғамның халықаралық әріптестікті кеңейту жөніндегі жүйелі жұмысының жалғасы болды. 2025 жыл ішінде «ҚазМедТех» АҚ сондай-ақ Корея Республикасы мен Қытай Халық Республикасының жетекші медициналық техника өндірушілерімен бірқатар келіссөздер мен жұмыс кездесулерін өткізді. Кездесулер барысында зауыт-өндірушілерден тікелей сатып алуды лизингтік тетіктер арқылы жүзеге асыру және экспорттық-кредиттік агенттіктерді тарту мәселелері қарастырылды.
«ҚазМедТех» АҚ отандық медициналық ұйымдарды заманауи жабдықтармен және инновациялық технологиялық шешімдермен қамтамасыз ету жөніндегі стратегиялық міндетін іске асыруды жалғастыруда. Саланың жаһандық көшбасшыларымен халықаралық ынтымақтастықты дамыту елдегі денсаулық сақтау жүйесінің тұрақты әрі тиімді моделін қалыптастырудың негізгі элементтерінің бірі болып табылады.