«ҚазМедТех» АҚ Sinopharm (ҚХР) компаниясының өкілдерімен кездесу өткізді.

«ҚазМедТех» АҚ фармацевтика, медициналық жабдықтар және биомедициналық технологиялар саласындағы Қытай Халық Республикасының ірі мемлекеттік холдингтерінің бірі – Sinopharm компаниясының өкілдерімен жұмыс кездесуін өткізді.
Кездесу барысында тараптар медициналық жабдықтарды жеткізу және енгізу бағытындағы ынтымақтастықты дамыту перспективаларын, сондай-ақ лизингтік қаржыландыру тетіктерін пайдалану мүмкіндіктерін талқылады. Бұл тәсіл медициналық ұйымдарға елеулі біржолғы қаржылық жүктемесіз материалдық-техникалық базаны кезең-кезеңімен жаңартуға мүмкіндік береді.
Sinopharm өкілдері компанияның халықаралық жобаларды іске асыру тәжірибесін, медициналық жабдықтардың кең ауқымды портфелін және медициналық ұйымдарды кешенді жарақтандыруға бағытталған жүйелі тәсілін таныстырды. Өз кезегінде «ҚазМедТех» АҚ денсаулық сақтау саласын техникалық жарақтандыру бағытындағы басымдықтар, қызметінің негізгі бағыттары және институционалдық әріптестік мүмкіндіктері туралы ақпарат ұсынды.
Кездесу қорытындысы бойынша тараптар одан әрі диалогты жалғастыруға және ынтымақтастықтың нақты бағыттарын, оның ішінде өндірісті ықтимал жергіліктендіруді, бірлескен жобаларға қатысуды және сараптамалық тәжірибе алмасуды пысықтауға өзара мүдделілік білдірді.
«ҚазМедТех» АҚ Қазақстанда медициналық көмектің қолжетімділігін, сапасын және технологиялық деңгейін арттыру мақсатында медициналық жабдықтардың жетекші халықаралық өндірушілерімен әріптестік қатынастарды дамыту бағытындағы жұмысын жалғастыруда.